03.06.2006

Frühelig isch gstriche, Summer isch gwiche

Text von Mischa Wyss
Was isch dr Mai? Ja zwifusfrei isch's Rägeguss im Überfluss.

Was isch dr Mai?

Ja zwifusfrei

isch’s Rägeguss

im Überfluss.

Bachnass verschifft!

Was das betrifft,

verschiff ne ig –u wird’ ne los–

gli üb’re Jordan mit me Floss!

Ig strich ne hür us dr Agända,

striche früsch o mini Wänd a

mit ‘re blümlete Tapete,

fire nachhär d Früheligs-Fete

i min eigete vier Wänd

anstatt veruss uf offnem Gländ.

Verputzt si d Wänd mit Blueme bunt.

Nur so obwohu es si Atrappe

chan ig doch Früheligsgfühu ha und

bruch trotzdäm weder Schirm, no Chappe.

S isch itz nüm Mai…

Blib nüm dahei!

Zum Gang vor d Tür

strich ig mi hür

wie d Wänd mit Putz

vou Sunneschutz.

Die blüemlete vier Zimmerwänd

hei ändlich minger Blüeteständ

aus vor mim Hus die Früheligswise.

D Sunne me heig’s nachegwise

schieni schiens o das Jahr wieder

ab u zue uf d Ärde nieder.

Ändlich Juni! Usen itz!

Usen i die Summerhitz!

Ja nei! Da git’s no eis Problem:

Die Hitz, chunnt frühechschtens Ändi Juli!

Bis da chläbt d Hut vor Sunnecrèm

haut unagnähm am Winterpulli.

Ähnliche Artikel